ഒരു പക്ഷെ സുഖ്റാമിനും ബാലകൃഷ്ണപിള്ളക്കും ശേഷം ഒരു രാഷ്ട്രീയ നേതാവ് കൂടി അഴിമതിയുടെ പേരില്‍ ജയിലില്‍ പോകുന്ന വാര്‍ത്ത കൌതുകം പകരുന്നു. മുന്‍ സിക്കിം മുഖ്യമന്ത്രി നര്‍ ബഹാദുര്‍ ബണ്ഡാരിയാണ് അഴിമതിക്കേസില്‍ ശിക്ഷിക്കപ്പെട്ടിരിക്കുന്നത്. 25-10-2008 ല്‍ അഴിമതി നിരോധനനിയമനുസരിച്ച് ശിക്ഷിക്കപ്പെട്ട ഇദ്ദേഹം നീണ്ട നിയമയുദ്ധങ്ങള്‍ക്കൊടുവില്‍ കോടതി മുമ്പാകെ കീഴടങ്ങുകയും ഇദ്ദേഹത്തെ ജയിലിലേക്ക അയക്കുകയുമാണെത്രെ ചെയ്തത്. പതിവുപോലെ ജയിലിലെത്തുമുമ്പ് ഇദ്ദേഹത്തിനും ഹൃദയാസ്വാസ്ഥ്യംമുണ്ടാവുകയും ഇദ്ദേഹത്തെ ആശുപത്രിയില്‍ അഡ്മിറ്റ് ചെയ്യുകയും ചെയ്തിട്ടുണ്ട്. മാത്രമല്ല ആറുമാസത്തെ ശിക്ഷ സിക്കിം ഹൈക്കോടതിയുടെ ഉത്തരവനുസരിച്ച് ഒരുമാസമായി വെട്ടിചുരുക്കുകയും ചെയ്തിട്ടുണ്ട്. അതായത് ശിക്ഷിക്കപ്പെട്ടെങ്കിലും ജയിലില്‍ പോകാതെ ഒരു മാസം ആശുപത്രിയില്‍ കഴിഞ്ഞാല്‍ മതി ഇദ്ദേഹത്തിന്. ഭണ്ഢാരിയുടെ സൌഭാഗ്യം പക്ഷെ ബാലകൃഷ്ണപിള്ളക്ക് ഇതുവരെ ലഭിച്ചിട്ടില്ല. എന്നാല്‍ ഏറെ രസകരമായിട്ടുള്ളത് മൂന്ന് പേരും സമാനമായ ചിന്താഗതി വച്ചുപുലര്‍ത്തുന്നവരാണെത്രെ! സിക്കിമിലെ ജനങ്ങള്‍ക്ക് വേണ്ടി അദ്ദേഹം ജയിലില്‍ പോകാന്‍ തയ്യാറാണെന്നും ജയില്‍ ശിക്ഷകഴിഞ്ഞാല്‍ വീണ്ടും രാഷ്ട്രീയത്തിലേക്ക് തിരിച്ചുവരുമെന്നും ജനങ്ങളെ സേവിക്കുമെന്നും ഇയാള്‍ ഉറപ്പു തരുന്നുണ്ട്. സുഖ്റാമും പിള്ളയും ഇതുതന്നെയാണ് പറയുന്നത്. നോക്കണെ ജനങ്ങളുടെ ഒരു ഭാഗ്യം.
എനിക്ക് തോന്നുന്നത് ഇങ്ങനെ മന്ത്രിമാരെയും മുഖ്യമന്ത്രിമാരെയും കോടതികള്‍ കണ്ണില്‍ ചോരയില്ലാതെ ശിക്ഷിക്കാന്‍ തുടങ്ങിയാല്‍ എന്താകും ഭാരതത്തിന്റെ സ്ഥിതി! ജയിലില്‍ നിന്നു് സ്ഥാനാര്‍ത്ഥിയായി തെരെഞ്ഞടുപ്പില്‍ മത്സരിക്കുന്നതുപോലെ, ജയിലില്‍ കിടന്ന് നമ്മെ ഭരിക്കാനുമുള്ള ഒരു നിയമം കൊണ്ടുവരേണ്ടിയിരിക്കുന്നു. എന്തായാലും ഇപ്പോള് സിക്കിം പ്രദേശ് കോണ്‍ഗ്രസ്സ് പ്രസിഡണ്ടായി ഇയാളെ ആ സ്ഥാനത്ത് നിന്ന് മാറ്റേണ്ടതില്ലായെന്നും ജയിലില്‍കിടന്നുകൊണ്ടുതന്നെ പ്രദേശ് കോണ്‍ഗ്രസ്സിനെ ഭരിക്കാന്‍ സര്‍വ്വതാ യോഗ്യനാണ് ഇയാള്‍ എന്ന് സംസ്ഥാന ഘടകം അഭിപ്രായപ്പെട്ടിരിക്കുന്നു. ഇത് കൊണ്ടാണോ എന്നറിയില്ല 1979 മുതല്‍ 1994 വരെ പല രാഷ്ട്രീയകക്ഷികളുടെ പേരിലുമായി സിക്കിം ഭരിച്ച ഇയാള്‍ പിന്നീട് കോണ്‍ഗ്രസ്സില്‍ തന്നെ ചേര്‍ന്നത്.
സുഖ്റാം ജയിലില്‍ നിന്ന് മോചിതനായപ്പോള്‍ നൂറുകണക്കിന് വാഹനങ്ങളുടെ അകമ്പടിയോടെയാണ് ജനങ്ങള്‍ ഇയാളെ ജയിലില്‍ നിന്ന് സ്വീകരിച്ചാനയിച്ചുകൊണ്ടുപോയത്. ശിക്ഷിക്കപ്പെട്ട ബാലകൃഷ്ണപിള്ളക്കും കിട്ടി ഉഗ്രന്‍ സ്വീകരണങ്ങള്‍. ഭണ്ഢാരിക്കും സ്വീകരണങ്ങള്‍ ഉണ്ടായിരിക്കുമെന്നതുറപ്പാണ്. ഇതൊക്കെ കാണുമ്പോള് തോന്നും ഇവരെ ശിക്ഷിച്ചത് അഴിമതിക്കേസിലല്ല സ്വാതന്ത്ര്യസമരത്തില്‍ പങ്കെടുത്തതിനാണ് എന്ന്. രാഷ്ട്രീയക്കാര്‍ക്കോ നാണമില്ല, ജനങ്ങള്‍ക്കുമില്ലേ നാണവും മാനവും…..
ഒരു കാര്യം ഉറപ്പ് ജയില്‍ മോചിതനായാല്‍ ഇവര്‍ വീണ്ടും നമ്മെ സ്നേഹിച്ച് കൊല്ലുമെന്ന്. എന്തൊരു രാജ്യസ്നേഹം!
VIRALMOZHI.COM 